Տեղեկատվական հարթակներում հայտնված լուրը, թե իբր Հայաստանը պաշտոնապես սկսել է Ուկրաինային մատակարարել խորհրդային արտադրության զենքեր, բավականին մեծ աղմուկ է բարձրացրել։ Մասնավորաբար, նշվում է, թե իբր Հայաստանի Հանրապետության կառավարության և Եվրահանձնաժողովի միջև կնքվել է համաձայնագիր, ըստ որի, Հայաստանը Վրաստանի նավահանգստով Եվրոպային կփոխանցի խորհրդային արտադրության տանկեր և հակաօդային պաշտպանության հրթիռներ, որոնց ընդհանուր արժեքը կկազմի 210 միլիոն ԱՄՆ դոլար։ Ավելին, ասում են՝ իբր Երևանը Կիևին կփոխանցի իր գործող հակաօդային պաշտպանության համակարգերը և 152 մմ-ոց հրետանին։ Այս տեղեկությունը ոչ միայն Հայաստանի իշխանությունների, այլև Հայաստանի ու հայերի հասցեին մեղադրանքներ հնչեցնելու առիթ է դարձել: