Այս օրերին շատերն են արձանագրում, որ Հայաստանում Արևմտյան Նեղոսի տենդի վերաբերյալ հարցերն ավելի շատ են, քան պատասխանները, իսկ ԱՆ Հիվանդությունների վերահսկման և կանխարգելման ազգային կենտրոնի պարզաբանումներն ավելի մեծ շփոթություն են առաջացնում։ Առողջապահության նախարարությունն օգոստոսի 19-ին հայտնել էր, որ Հայաստանում գրանցվել էր Արևմտյան Նեղոսի տենդով վարակվելու դեպք, որը փոխանցվել էր մոծակի խայթոցի միջոցով։ Օգոստոսի 21-ի դրությամբ՝ ՀՀ-ում հիվանդության հաստատված դեպքերի թիվը հասել էր 58-ի, որոնցից 4-ի վիճակը ծանր էր։ Օգոստոսի 23-ի դրությամբ Հայաստանում Արևմտյան Նեղոսի տենդով հաստատված դեպքերի թիվն արդեն 75 էր։ Ընդ որում, կենտրոնը պնդում է, որ Արևմտյան Նեղոսի տենդից մեկ մարդ է մահացել, որոշ լրատվամիջոցներ նշում են, թե զոհերի թիվը չորսն է։