Հայաստանում չկան քաղբանտարկյալներ։ Այս մասին այսօր կառավարության նիստից հետո լրագրողների հետ ճեպազրույցում հայտարարեց արդարադատության նախարար Գրիգոր Մինասյանը։ Մինասյանն ասաց․ «ՀՀ-ն ժողովրդավարական երկիր է այնքանով, որ ամեն օր բացում ես սոցիալական ցանցերը կամ հանրային խոսույթում տեսնում ես, թե ինչքան ընդդիմադիրներ եւ իրենց փաստաբաններ գոհունակություն են հայտնում այս կամ այն վճռով իրենց նկատմամբ արդարացի որոշումից»։ Նախարարի ներկայացմամբ՝ յուրաքանչյուրն իր պաշտպանական ռազմավարությամբ է որոշում, թե ինչպես է այն իրականացնում․ «Կան մարդիկ, որոնք ինչ որ ժամանակահատված պետական պաշտոն են զբաղեցրել, եւ բնական է, որ եթե իրենց նկատմամբ քրեական վարույթ է իրականացվում, իրենց փաստաբաններն ընտրում են ամենահեշտ պաշտպանվելու միջոցը՝ այդ գործը պարուրելով քաղաքական էլեմենտներով։ Իրականությունը հետեւյալն է՝ լինի գործող, նախկին, թե ապագա պաշտոնյա, Հայաստանում բոլորը պետք է իմանան եւ գիտեն, որ չկան յուրայիններ եւ ոչ յուրայիններ։ Եթե մարդը կասկածվում է հանցագործության մեջ, անպայման մեր իրավապահները համապատասխան գործողություններ են անում»։ Արդյոք ոստիկանը բերման ենթարկելիս պետք է ոտքը դնի քաղաքացու գլխին, դա նորմա՞լ է, այս հարցին ի պատասխան էլ նախարարն ասաց. «Ընթացիկ գործերով, ես՝ որպես նախարար, չեմ կարող կարծիք հայտնել, քանի որ դա կդիտվի կառավարության կողմից միջամտություն եւ ճնշում։ Բայց այստեղ ապացույցը, որ բոլորս տեսնում ենք՝ արդյոք բոլորի նկատմամբ է նման վերաբերմունք ցուցաբերվում, հետեւյալն է՝ արդյոք ՀՀ-ում կան գործող բարձրաստիճան պաշտոնյաներ, իրենց բարեկամներ, որոնց նկատմամբ հանգիստ կարելի է քրեական հետապնդում իրականացնել, պատասխանը՝ այո»։