2020թ. սեպտեմբերի 27-ին թշնամին հարձակվեց Արցախի վրա: Տեղի ունեցած պատերազմի ժամանակ հայկական կողմը ջախջախիչ պարտություն կրեց: Հանձնվեց Արցախի զգալի հատվածը: Հանձնվեց Շուշին: Զոհվեց մոտավորապես 5000 հայ երիտասարդ: Այսօր՝ պատերազմի մեկնարկի երկրորդ տարելիցի օրը, հանրության համար դեռ կան ցավալի և չպարզաբանված հարցեր. արդյոք հնարավոր չէ՞ր կանխել աղետը, ինչու՞ որևէ քայլ չարվեց, որպեսզի թշնամին զրկվեր հարձակման հնարավորությունից, որո՞նք էին 2020թ. հուլիսին տավուշյան արկածախնդրության իրական մոտիվները, ինչու՞, երբ թուրքական բանակը զորավարժության շղարշի ներքո վերջին 100 տարվա մեջ առաջին անգամ հայտնվեց Հարավային Կովկասում` Նախիջևանում, և երբ արդեն գրեթե ամեն օր տեղեկություններ էին տարածվում Բայրաքթարներով բեռնված ինքնաթիռների Բաքու վայրէջքների մասին, հայկական կողմից որևէ քայլ չէր արվում երկիրը պատերազմին պատրաստելու համար: