Արցախի իշխանությունները մեկուսացված են հայ-ադրբեջանական, մասնավորապես՝ խաղաղության պայմանագրի նախագծի մշակման շուրջ բանակցություններից։ Այս մասին է վկայում «Փաստինֆո»-ի հարցմանն ի պատասխան Արցախի նախագահի մամուլի խոսնակ Լուսինե Ավանեսյանի պատասխանը։ Ինչպես արդեն հայտնել ենք՝ Բրյուսելում օգոստոսի 31-ին կայացած Փաշինյան-Ալիև-Միշել հանդիպմանը պայմանավորվածություն էր ձեռք բերվել՝ ԱԳ նախարարների մակարդակով շարունակել առարկայական բանակցությունները խաղաղության պայմանագրի նախագծի մշակման շուրջ: ՀՀ վարչապետ Փաշինյանն ԱԺ-ում ունեցած ելույթներից մեկում հայտարարել էր, որ կա գաղափար՝ ԼՂ հարցը տարանջատել Հայաստան-Ադրբեջան հարաբերություններից: «Մենք հիմա ակտիվորեն պիտի քննարկենք այդ տարբերակը եւ որոշենք ինչպես առաջ ընթանալ»,-ասել է Փաշինյանը: Պարզելու համար՝ Արցախի իշխանությունները տեղեկացվա՞ծ են արդյոք՝ ԼՂ հարցը տարանջատված է, թե ոչ, մշակվող փաստաթղթի նախագծի մեջ ԼՂ-ին վերաբերող դրույթ, արձանագրում լինելու է, թե ոչ և, եթե այո, ապա ինչպե՞ս է այդ փաստաթուղթն առնչվելու ԼՂ հարցին, «Փաստինֆո»-ն դիմել էր Արցախի նախագահի մամուլի խոսնակին։