Այսօր պարզ դարձավ, որ իշխող ուժը գլխավոր դատախազի պաշտոնում առաջադրելու է Աննա Վարդապետյանի թեկնածությունը: Աննա Վարդապետյանը լինելով վարչապետի օգնական արդեն իսկ հայտնվել է այնպիսի մեծ սկանդալի կենտրոնում, որը լիովին պետք է բացառեր նրա թեկնածությունը այդպիսի պաշտոնին: Խոսքը վերաբերվում է ՀՖՖ նախկին նախագահ Ռուբեն Հայրապետյանի գործին նրա միջամտությանը: Հիշեցնենք, որ Վարդապետյանը լինելով վարչապետի օգնականը միջամտել էր ՀՖՖ նախկին նախագահ Ռուբեն Հայրապետյանի դեմ հարուցված քրեական գործին, նույնիսկ խմբագրել էր նրան առաջադրված մեղադրանքը՝ այդպես միջամտելով սահմանադրական անկախ կառույցի գործունեությանը։ Հետևաբար Աննա Վարդապետյանի առաջադրումը իշխող ուժի անաչառության համատեքստում օբյեկտիվ պատճառներով լրջագույն կասկածներ է հարուցում: Վերջիվերջո Վարդապետյանի անաչառությունը կասկածի տակ դնելուն նպաստում է նաև այն, որ Վարդապետյանը, լինելով վարչապետի օգնական, փաստացի քաղաքական թիմի անդամ է: Բացի դա, աղմկահարույց է այն փաստը, որ որպես կանոն գլխավոր դատախազները մինչ այդ պաշտոնին հասնելը եղել են դատախազության աշխատակիցներ, զբաղեցրել են տարբեր պաշտոններ: Աննա Վարդապետյանի պարագայում այդ հանգամանքը բացակայում է: