Ժենգյալով հաց պատրաստելը իրենից ներկայացնում է մեծ արարողակարգ։ Ես դեռ տատիկիցս եմ սովորել և լսել, թե ինչպես են իրենք ժենգյալով հաց պատրաստելիս հարևաններով, բարեկամներով, հարազատներով լծվել գործին. մի մասը հավաքել է, մյուսները՝ լվացել, կտրել։ Այդ օրը, բոլոր նրանք, ովքեր անգամ միմյանց հետ խնդիր ունեն, մոռանում են ամեն ինչ և լծվում գործին։ Այս մասին այսօր՝ մայիսի 8-ին, Ֆրանսիայի հրապարակում արցախյան բարիքների հյուրասիրության ժամանակ AntiFake.am-ի հետ զրույցում պատմեց Արցախի Մարտունու շրջանի Սառցաշեն գյուղից Քրիստինե Ասլանյան։